1: شكون لي قالك أن الكون ماتخلقش غير هاذي 5 دقائق .. 2: وا لكن را أنا عايش من شحال هاذي ماشي غير من هنا 5 دقائق .. 1: شكون قالها ليك ؟ شكون قالك أن حياتك مابدأتش غير من هنا 5 دقائق .. و شكون قالك أنك ماتخلقتيش بالعمر لي نتي عليه قبل دابا ب5 دقائق ؟ 2: و لكن أن عشت قبل من دابا ب5 دقائق .. واش تاتقول أنني عشت شي فترة قبل مانكون كّاع ؟؟ و باش تاتفسر هاذ الخبشة لي في وجهي ؟؟ 1: أنت تخلقتي قبل من دابا ب 5دقائق بوجه فيه ديك الخبشة ....
لحد الساعة يالاه شفت 45 فيلم من إنتاجات 2019، و ربما غادي نوصل لحدود 70 تال 80 ايلا طرت (فيها حتى إنتاجات برا هولييود). هاذ العام كان أغرب عام سينمائيا، كان أحسن بزاف من 2018 و لكن ماكانش النسق متوازن، بدأ العام ناضي و عاود طاح النيفو و عاود رجع. عام لا ينسى، مارتن سكورسيزي، تارانتينو، آلباتشينو، دينيرو، جو بيتشي، براد بيت، ديكابريو، كريستيان بيل و مات دايمن، و زيد و زيد و زيد … أحسن دراما شفت لحد لساعة هي الفيلم لكوري Parasite....
أجمل ما في تارانتينو أحمق و تايدير لي فراسو بلا مايتسوق لي تاحاجة، ماكاينش شي أنترفيو معاه من غير جمل بحال “تارانتينو نقص الدم”، “تارانتينو نقص الرجلين”، تارانتينو باراكا من الكادراج الأحمق" .. و عاد ما زايد تايتمدد. آخر فيلم، ديالو لي في نظري من أحسن أفلامو “سينماتوغرافيا” كان Once Upon a time. أحسن فيلم شفت هاذ العام تقريبا “سينماتوغرافيا”. فيلم بديع !! شمنك يا كاميرا، شمنك يا حوار شمنك يامواقف، شمنك ألوان، شمنك يا موسيقى....
تايكا أولا فنان، حر، تيدير لي بغى هو بلا مايتسوق ليك أنت شنو بغيتي تشوف. دائما خارج على المألوف و دائما كاسر الطابوهات و متجاوز الحدود بأذكى الطرق الممكنة، Waititi’s way. بالإضافة لهاذشي تايكا تايميتريزي الكاميرا، تايلعب بيها بأجمل الطرق و تايخرج لينا لوحات فنية معبرة و زوينة بزاف و غير مسبوقة. آخيرا، الماركة ديال تايكا، لي مايمكنش تلقى شي فيلم ديالو بلا بيها، لي هي الكومديا السوداء ديالو. كوميديا جريئة و حمقة و معندهاش حدود، هاذ الكوميديا تايتميز بيها على جميع المخرجين لي شفت ليهم أفلام....