كان يا ما كان في هوليوود

أجمل ما في تارانتينو أحمق و تايدير لي فراسو بلا مايتسوق لي تاحاجة، ماكاينش شي أنترفيو معاه من غير جمل بحال “تارانتينو نقص الدم”، “تارانتينو نقص الرجلين”، تارانتينو باراكا من الكادراج الأحمق" .. و عاد ما زايد تايتمدد.

آخر فيلم، ديالو لي في نظري من أحسن أفلامو “سينماتوغرافيا” كان Once Upon a time. أحسن فيلم شفت هاذ العام تقريبا “سينماتوغرافيا”. فيلم بديع !! شمنك يا كاميرا، شمنك يا حوار شمنك يامواقف، شمنك ألوان، شمنك يا موسيقى. شمنك يا ليوناردو دياكابريو آآآآآآآه شحال وصل للكمال هاذ السيد، براد بيت تاهو ماقصرش.

الفيلم ريثموا بطيـــــــــــــــــــء جدا، خاصة في النصف الأول و مافيهش حتى قصة. فيه أحداث مبعثرة، تايعودوا قصص بزاف من هوليوود الستينات، أهمهم قصة الممثل ريك دالتون، و قصة الصداقة بين ريك و كليف بوث الدوبلير دايلو، و قصة صعود شارون تايت …

شفت الفيلم 2 مرات، المرة الأولى استمتعت بزاف بالسينما لي فيه و خاصة بالتمثيل و خاصة ديال ديكابريو (لي توحشت نشوفوا في فيلم بالجهد). و لكن مافهمت تالعبة في الفيلم، جاني ما فيه معنى، حيت القصة ماكايناش و الstory telling مختلف، و في نفس الوقت ماكاينش جدوى أو ميساج أو على الأقل كاين و مافهمتوش.

المرة الثانية، مشيت قريت على القصة ديال شارون تايت، و شفت بزاف ديال الانترفيوز مع تارانتينو و فريق العمل و فهمت الميساج مزيان هاذ المرة. و آآآآآآه شحال استمتعت !

فيلم Once Upon a Time كان تكريم لHollywood و لLA و لواحد الحقبة في تاريخها، لواحد الناس عاشوا فيها، واحد العلاقات تكونوا فيها، و لواحد القصص تعاشوا فيها.

ما كرهتش من قلبي نشوف فيلم مغربي في نفس التوجه، فيلم تايكرم حقب في تاريخ المغرب و في تاريخ مدن، حقب تاواحد ماعمروا تسوق ليها، حقب لي كانوا فيها قصص غنية و لا نهائية و لي ممكن تخرج منها 1000 فيلم.