من بعد أطول سطاج في التاريخ (أكثر من 10 أشهر) قررت نشد لارض و نرتاح استعدادا للعمل الجديد.
و بالفعل مازال مادازتش حتى سيمانا، جاتني واحد الفرصة باش نقري طلبة ديال الماستر في فرنسا على Database Security.
شوف! منين كنت في المدرسة، كنت مولف بهاذشي، أصلا كنت مسؤول على الفروماسيون بعامين متتاليين في EIC لي هو النادي ديال لانفورماتيك في لينصا.
و لكن الفرووونسي آ صاحبي الفرونسي و زيد عليها Database Security لي شي حاجة غير كانسمع بيها و صافي.
من بعد شوية ديال الأخد و الرد اقتنعت. أصلا غير 6 ديال الحصص، و الكور موجود و فيه 180 صفحة يعني 30 باج في الحصة و عاد كاينين labs يعني ماعندي فين نوحل.
هي هاذيك، كانت بقات واحد اليومين و الدرس غادي يبدأ الأربعاء، بقيت ممشغل مع شي حاجة (واقيلة أونتخوتيان ولا شي لعيبة) و الثلثاء منين جيت نقرا الكور باش نكون موجود.
تسنى الدقة .. غير تسنى الدقة ههههههههه
الكور صدق باوربوانت محول لpdf و فيه واحد 50 ولا 60 صفحة معاودة. و ذاكشي لي تانقرا فيه مافهمت فيه حتى زفتة
بلاتي مازال كاين الخير، هزيت حوايجي و قصدت التران باش نهبط لكازا (عاوتاني واقيلا على وديت أونخوتيان).
المهم وصلت لكازا بيخير و على خير و كولشي زين، تانجبد المايل تانلقى استعمال الزمن .. و هنا للمرة الثانية شمس العشية .. الحصص فيهم 6 دالسوايع و نص و غادي نقري ما مجموعه 39 ساعة يعني سوميستر آ البطل ههههه
ماعرفتش باش تبليت ديك الساعة، المهم بديك الشوية ديال القراية لي قريت في التران و شوية أخرى قريتها في الدار في كازا، تشجعت و توكلت على الله.
من الحوايج لي كانو معاونيني هو أن البارتي الأولى كان فيها مقدمة على Databases و البارتي الثانية كان فيه Mysql Security لي أنا مولفها شوية و فايت خدمت بيها قبل.
النهار بدا، فقت مع النبوري و بديت تانوجد عاوتاني .. وصل الوقت دخلت لteams و …
Bonjour Monsieur .. Bonjour Monsieur.
واهيا ناري شهاذشي تايوقع ليا، هاذ الشي عاد دابا شي شهورا كنت أنا لي تانقولو و دابا تقلبات الآية
المهم درت الغياب، و قيدت الناس لي مغيبين ههههه .. و كل ساعة تايجي شي حد معطل تايقول لي أستاذ عافاك مسحني من الغياب
Celui qui vient tard la prochaine fois sera sanctionne! Attention ! hhhhhhhhhhhhhh
للإشارة هاذشي علاش تايضحك حيت أنا كنت أسطورة في الغياب، و دارت الأيام تاوليت أنا تانقيد الغياب ههههه
دازت الحصة الأولى مزيانة، كلشي كان محيد الميكرو و ناعس (غالبا)، من غير شي عناصر قلال لي كانوا متبعين معايا و تايسولوني مرة مرة.
المهم سلكت أموري مع Mysql و مانعاودش ليكم شحال ديال التمطيط درت في ديك الحصة، كلما تانكمل شي بارتي تانسولهم شكون لي بغا يدير ملخص لداكشي لي هضرنا عليه و منين تايجاوب شي حد تانعاود نكمل الجواب ديالو و شي مرات تانعاودو
La participation sera notee! Attention ! hhhhhhh
هي هاذيك، سالات الحصة الصباحية، عطيتهم 2 سوايع ديال البوز و مشيت تغديت بالزربة و رجعت تانوجد. زريت على واحد TP ديال Mysql Server Installation وجدت ليهم الأسئلة و البارتيات بالزربة و مشينا لي Discord .. المهم الطلبة تفرقوا على مجموعات و كل واحدة خدمات بوحدها ..
هنا عاوتاني كانوا لعيبات زوينين، فكروني في يامات القراية .. كيفاش الطلبة كانوا تايتجمعوا و شي تايمشي مع شي و كيفاش تايدابزوا على الكّروبات.
المهم دازت الأمور بسلام، كل مرة تاندوز عند مجموعة تانشوف فين وصلوا حتى سالات الحصة .. وااااو النهار الأول داز بسلام.
الوحش جا .. هاذ الحصة على Oracle DB لي واخا كنت قريت عليها شي بركة (جبت 18 في الموديل ديالها في المدرسة) ماكان عندي تا فكرة على security ديالها .. و زيد على هاذشي كامل الكور قصير و الTP ماعندي تاشي فكرة على شنو ندير فيه
و باش غاتزيد تزها الباهية .. ذاكشي لي كليت النهار لي قبل صدق مسموم و دار ليا المشاكل في المسارن. و وليت ما حيلتي نمشي نوجد و ما حيلتي نديها في مسارني.
نعست ديك الليلة بكري و الغد ليه فقت مع النبوري عاوتاني و بديت رحلة التوجاد.
الكور كالعادة داز عادي، كان ذاكشي صعيب على الوليدات و هنا بديت كانتكعبل، حيت حتى أنا ماكنتش ضابط داكشي مزيان. و الأسئلة لي كانوا تتطرحوا عليا واخا قلال خلاوني نزيد نفهم أكثر. دابا وليت تانطير في Oracle أكثر من للي كنت
دابا الحريرة الكبيرة هي شنو غادي نديرو في العشية ههههه .. تداركت الأمور بالزربة و قررت ندخلهم عندي للملعب ديالي و ندير ليهم تي بي ديال Docker و من بهد ما شرحت ليهم شناهوما الcontainers بالزربة عطيتهم تمارين يخدموهم كمجموعات كالعادة.
للمرة الثانية على التوالي تانفلت و تايدوز النهار بيخير و على خير. وكولشي فرحان. و لكن هاذ المرة هي اللخرة ليا .. تزاد عليا الحال و بدات كرشي تاتضرني أكثر، و نهار كامل ماكليت والو من غير شي بيمو و عصير دالليمون.
و الأسوء هي الدرس الأخير على MS SQL لي ماعندي عليها حتى شي فكرة و الدرس لي عندي ما فيه الا شي 12 صفحة، يعني حريرة.
في هاذ اللقطة غادي نجبد واحد الورقة من أعماق المخيخ المتمخمخ ديالي و لي بلا كذوب خديتها من عندها شي أساتذة قراوني.
غدا عندكوم إكسبوزي
النهار لي موراه كنت رجعت للدار في حالي، و هاذ النهار ما قدرتش نفيق على النبوري، عييت .. من بعد أقل من ساعة ساليت الدرس، و زدت مددت المدة ديال الحصة بواحد الملخص ديال الدرس كامل و سولتهم شكون لي عندو شي سؤال و دردشنا شوية حتى بقات ساعة هاكاك. ونزلت عليهم بالصاعقة.
عطيتهم 5 ديال المواضيع و قلت ليهم كل مجموعة تختار واحد توجدوا باش يبرينزونطيو كولشي بالعشية.
ناضت الروينة في الMeeting و كّاع لي عمرهم هضروا سمعتهم تايهضروا .. كلشي تايقول لي نخليها تال سيمانا الجاية، حيت قربو عندهم الامتحانات و عاوتاني جبدت ليهم ورقة أخرى من الدكة ديالي الجميلة و قلت ليهم: دبروا راسكم أنا كون تجيوا عليا برينزوطيو و حيدوها عليكم، أنا غا من مصلحتكم تانقول برينزينطيو دابا
و من بعد أخد و رد اقترحت عليهم ياخدوا ديك الساعة لي بقات من حصة الصباح و أخرى من حصة العشية باش يوجدوا البريزونطاسيو دبالهم و هاكا كنت ضربت عصفورين بحجر واحد. منها لقيت باش نعمر الساعات لي بقاو شايطين لي بلا كور و منها الوليدات غادي يديروا بريزونطاسيون و يوجدوها خفا زربا بلا ماينبرزطوا مع الامتحانات الأخرين.
النهار الأخير داز زوين مع البريزونطاسيو ديال الدراري و البنات و لكن داز عليا جحيمي حيت الألم و المرض ديال الكرش وصل عندي للحدود و ضربني واحد العياء رهيييييب.
ساليت و الحمد لله كلشي داز بيخير و كنت فرحان و فخور بالتجربة و قررت نحبس هنا
مشيت عند الصديق لي مكلف بالبروغرام و قلت ليه بلي عييت و مانقدرش نكمل الحصص الثلاثة لي باقين في السيمانة الجاية .. و قال لي بللي صعيب يلقاو شي حد في هاذ الوقت القصير و بللي هاذ الحصص الجايين كافي ندير فيهم غير labs و هانا ناضي.
من بعد شوية ديال الأخد و الرد اقتنعت. أصلا غير 3 ديال الحصص لي بقاو، و كاينين labs يعني ماعندي فين نوحل.
تسنى الدقة .. غير تسنى الدقة ههههههههه
تال الجزء 2 .. من هنا لتما هاك قرا السلايدس ديال الكور ممكن ينفعوك في شي حاجة ..
بسلامة 👋👋