بس: جيت نكتبهم كاملين لقيت راسي طولت بزاف، غانخلي غير جوج و صافي.
1- الطيبوبة Kindness
عامل الناس بطيبوبة، في علاقاتك مع الناس ماشي غير تكون ضريف، و لكن كون طيب معاهم على قدر المستطاع. عاون الناس ديال بالصح، بنيتك. و ايلا مقديتيش قول ماقديتش عاود بنيتك.
طلّع بالناس، و عطيهم قيمة و قلب على الزوين فيهم ديما. غايجيك هاذشي عبيط، و لكن را بالصح، شحال من حاجة زوينة وقعات في حياتي بسبب أنني تعاملت مع شي حد بطيبوبة .. و بزاف ديال الحوايج زوينين أنا فيهم دابا حيت واحد النهار تعاملت مع شي حد بطيبوبة.
و بالعكس، دزت من بزاف ديال مراحل الفراغ في حياتي، فين تلفات ليا البوصلة و مابقيت عارف ماندير، و السبب أنني بديت تا نتعامل مع بنادم بحال النوامر (أرقام) و تانبدأ نحسب في علاقاتي معاهم.
2- ماتقولش درت و درت Don’t Take Credit
شناهي أهم حاجة في الحياة ؟ السعادة ؟ الفلوس ؟ العلاقات ؟ لا هههههه .. أهم حاجة في الحياة هي الماء و الهواء، و تاواحد مارافد ليهم الهم حتى ماغايبقاوش .. و هذا هو البلان، الأهمية ديالك، و القيمة ديالك ماشي بالصداع لي تاتدير و لكن بشنو تايوقع منين تاتمشي،
و هاذ البلان و الله ايلا بالصح بالرب .. دزت من بزاف ديال الحالات و كانعرف بزاف ديال الناس سواء شخصيا و لا تانقرى عليهم لي عمرهم تايباننوا في الواجهة ولا تايقولو درنا و درنا، و لكن ايلا حيدتيهم تايريب كلشي من حولهم.
ديما حاول تكون بحال الماء، كون مهم و أثر في كّاع ذاكشي لي داير بيك و ماتمنش عليهم القيمة ديالك .. و هاكا القيمة ديالك غادي تبقى ثابتة و أبدية.