اليوم شفت واحد المزيكا و كليب ديال فهد بنشمسي أقل مايمكن نقول عليه أنه رااااائع.
العمل عبارة عن remake ديال الموسيقى الغناوية الموشهوة “خالي مبارا” .. اللحن بقى هو هو، و تبدل شوية في الكلمات، اللي تعصرنوا و تزادت عليهم واحد اللمسة كوميدية.
الموسيقى كانت رائعة، بحيث أنها كانت fusion الأصل ديالها الموسيقى الغناوية و مدردر عليها تلونات عصرية، خاصة من جهة Drums (كالعادة في هاذ الموسيقى لي ولا تايدير فهد بنشمسي مؤخرا) .. لي جديد هاذ المرة هي المشاركة ديال محسن فلان و هاذيك الآلة الموسيقة السوسية لي زاد على موضوع هاذ fusion جمالية أكبر بزااااف.
من جهة أخرى، الكليب كانو فيه بزاف ديال الشخصيات البارزة في المغرب منهم ممثلين، و مشاهير، و ناشطين حقوقيين و غيرهم. و في نظري هذا كان بحال التكريم لشي وحدين و اعتراف بالصداقة ليهم من طرف فهد.
حاجة أخيرة لي كانت رائعة في هاذ الخدمة هو التكريم ديال المعالمية ديال الفن الغناوي، بحال حميد القصري، حسن بوسو و عبد الكبير مرشان. باقحامهم في الكليب و الغناء لمدة لابأس بها.
من اللخر، خدمة 10/10 و مضروب فيها تامارة ديال بالصح.