نهار كنت غادي ندير أزمة ديبلوماسية بين المغرب و الجزائر

نهار قبل

• أنا: بغيت نشد أوطوسطوب لمعتركة من هنا و من تما نمشي نيشان لبوعرفة
• جادارمي: موحال واش تلقى لي يديك في هاذ الوقيتة، هاذ الطريق مادوازاش و أصلا مشى الحال.
• أنا: واخا شكرا، أنا نتسنى شوية و نرجع فحالي.

من بعد ما دوزت ليلة سحرية في الجوهرة المفقودة دبدو قررت نكمل نيشان لبوعرفة. قلت نستغل السوق لي كان تايعمر ذاك النهار و نشد شي طرونسبور لبوعرفة نيشان.

هي هاذيك هبطت للمحطة، و منين سولت قالو لي بلي كاين احتمال ضئيل باش نقدر نلقى الطرونسبور نيشان لبوعرفة و أنني غادي يخاصني ضروري نقسم الطريق لمعتركة و من بعد عين بني مطهر (بركم). تسنيت واحد الوقيتة في دبدو على الله يجي شي طاكسي و لا شي خطاف، و والو، الحركة منعدمة و أغلبية ديال الطرونسبور غادي غير للدواور القراب.

من بعد شوية قررت ناخد بالنصيحة ديال أغلبية دالناس لي كانو تما و نرجع للكروازمة لي كاينة في طريق تاوريرت و من تما نشوف شي ترونسبور.

• أنا: خويا شي بلاصة غير في الكروازمة ديال الجوندارم. مول الطاكسي: موحال تلقى الطرونسبور
• أنا: هانية
• مول الطاكسي: على مولانا

نزلت في الكروازمة .. أسهل طريقة باش نوصف البلاصة هي “لا طيرا يسير ولا بغلا يطير”، غير الخلاء و القيفار و باراج ديال الجوندارم و واحد الكلب مسكين مجلي بحالي.

من بعد شي دقائق قلال حطيت الساك و قصدت الجوندارم.

• أنا: بغيت نشد أوطوسطوب لمعتركة من هنا و من تما نمشي نيشان لبوعرفة
• الجادارمي: موحال واش تلفى لي يديك في هاذ الوقيتة، هاذ الطريق مادوازاش و أصلا مشى الحال.
• أنا: واخا شكرا، أنا نتسنى شوية و نرجع فحالي.
• الجادارمي: حنا ايلا بان لينا شي كاميو ديال السلعة و لا شي حد دايز نوقفوه ليك
• أنا: واخا الله يرحم الواليدين.

السلام الداخلي .. توسدت صاكي و تكيت تانتأمل و تانستمتع بالهدوء و السكينة لي في داك الخلاء و القيفار. من بغد شوية تفكرت بللي باقي عندي واحد ماتينا من الصباح ههه. جبدتها و قصمتها مع داك الكلب لي كان حدايا، وا شحال فرح بيها مسكين.

أو 45 غادي ننوض نمشي .. غادي توصل ال4 بيلا غادي ننوض نمشي .. من بعد دقائق ديال التردد، قررت نبدل الإتجاه و نرجع فحالي لتاوريرت.

هي هاذيك هزيت صاكي و دزت سلمت على الجوندارم و شكرتهم و مشيت للجهة الأخرى ديال الكروازمة، بقيت تما تانتسنى شوية و كانشير .. هاذ المرة الطريق كانت عامرة و دوازة. دازت شي دقائق الجوندارم الله يجازيهم بالخير وقفوا ليا واحد مول البيكاب.

ماحسيتش بالطريق دالرجعة، مصطفى ولا محمد، ماعقلتش على سميتو بالضبط. كايهز العلف و السلعة في الجهة كاملة، و الطريق كاملة و هو تايعاود ليا على المغامرات ديالو في الجهة و الجبال لي كان تايطلع ليهم بحثا على الكنوز و حتى الخدامي لي خدم في الجهة و برا الجهة.

وصلني لتاوريرت الله يخلف عليه، و هنا غادي يخاصني نبات الليلة في تاوريرت باش الغدليه في الصباح بكري نشد الطريق لعين بني مطهر في الكار.

لوطيل العجيب

تاوريرت فيها 2 دلوطيلات، واحد كاين في جوجل مابس و الثاني ماكاينش. دخلت ضربت طليلة على الريفيوز ديال الأول في غوغل تخلعت، بنادم تايقول بلي موسخ و عامر سراق الزيت و بلي مول لوطيل غريب في الطبع ديالو و مارتاحوش ليه. هي هاذيك قررت نمشي نشوف الثاني لي ماكاينش في مابس.

هي هاذيك، وصلت للوطيل، الباب ديال الزنقة محلول و قدام الكاراج كاين واحد كورسي و طابلة مشتتين فيها شي سوارت بالأرقام ديال الغرف. عقلي وقف لواحد الوهلة و قلت لي ليها ليها، عيطت على النمرة لي كانت معلقة في الباب، قال ليا خونا طلع تشوف فين غاتبات و أرا لاكارط و 50 درهم.

هي هاذيك، طلعت .. لوطيل .. كان فشكل، البيت كان عندو شرجم على واحد السطوان و ماشي على الزنقة و الناموسية كانت نقية ايلا حد ما و البيت ماكانش مفوه. لواحد الوهلة تفكرت السل و جميع الأمراض المنقولة بالهواء و قلت باراكا من الفشوش و تبعتهم بواحد أعوذ بالله من الشيطان الرجيم و تكمشت.

المهم خرجت كليت شي حاجة برا و تفرجت في واحد الماتش ديال البارصا واقيلا و رجعت للبيت كليت واحد دانون كانو عطاوه لي الجوندارم و نعست.

أحسن كار في العالم

من البارح و أنا فينما تانتلاقى شي حد و تانقول ليه المخططات ديالي في أنني باغي نمشي لبوعرفة تايقول لي تقريبا نفس الجملة.

• أنا: بغيت نمشي لبوعرفة.
• أي واحد: رجع في حالك لتاوريرت و غدا في الصباح بكري شد الكار الشهير لعين بني مطهر

الليل كامل و أنا متحمس نعرف هاذ الكار كيداير و علاش كلشي تايدوي عليه، الصباح بكري فقت و عيطت لواحد مول الطاكسي لي كان عطاني نمرتو باش يوصلني حتى لعند الكار.

و من بعد هاذ الإنتظار كامل، نقدر نقول ليك بلي هذا، من أحسن الكيران لي ركبت فيهم في حياتي ايلا ماكانش الأفضل على الإطلاق. بلاتي نقول ليك علاش.

الكار تايدير 2 رحلات في النهار كل نهار بدون ملل و بدون كلل. الرحلة الأولى تاتبدأ من تاوريرت. الإنطلاقة تاتكون مع الفجر، ماشي مع ال5 و ماشي مع ال3 و لكن مع الفجر. الكار تايمشي يوقف حدا الجامع معاياش ما كان الفجر. و تايتسنى المصلين حتى يساليو و تايهزهم باش يبدأ الرحلة ديالو.

الرحلة الثانية تاتكون مع الظهر ابتداء من جرادة رجوعا لتاوريرت عاوتاني. الكار تايمشي من تاوريرت لجرادة عبر بزاف ديال الفيلاجات و الدواور، و تايشكل وسيلة النقل الوحيدة لشي ناس لي تايتنقلو في المحور بين هاذ المدينتين، ايلا زكّلتيه خاصك تتسنى حتى غذا خاصة أن هاذ الطريق لي تايدير ماتايديرها حتى طرونسبور آخر.

بالاضافة لهاذشي الكار للجميع، الثمن ديال الرحلة لي كنت خلصت هو 25 درهم بين تاوريرت و عين بني مطهر لي مقارنة مع المسافة تايبقى رخيص بزاف، و خاصة مع التضخم لي ضارب العالم مؤخرا. للإشارة أنا قليل لي تايدير هاذ المسافة كاملة، أغلبية الركاب تايتنقلو بين الدواور بأثمنة تاتراوح بين 5 و 15 درهم ايلا بقيت عاقل

هاذ الكار ماشي مجرد وسيلة نقل و لكن مجتمع صغيور بحد ذاتو تايتلاقاو فيه الناس باش يطمأنو على بعضياتهم و باش يتبادلو الأخبار ديال بعضهم البعض. الشيفور شاد الطريق و إذا به تايشوف مي يزة لي كل نهار تاتكون تاتسناه واقفة في نفس البلاصة على جنب الطريق و هازة معاها شي دجاجات، تاينقص في السرعة و منين تايوصل عندها تايحبس و تايسلم عليها و تايطمأن على الصحة ديالها و على أحوال عائلتها منين تاتطلع مي يزة كاتسلم على شي ناس لي تاتعرفهم غير من الكار و تاتمشي تشد بلاصتها.

هاذ المشهد تكرر قدامي مرات ماشي قليلة، و قل ما كان شي حد تايطلع و ماتايسلمش على الشيفور و يسول فيه شوية قبل مايديماري و يكمل الطريق عاوتاني. الشيفور لي تايدير هاذ الرحلة يوميا، مايمكنش شحال ضريف و مسعف و عندو الخاطر.تايعطي لكولشي وقتو و تايسول في كولشي، بحال شي ملاك سيفطو الله لهاذ الناس يوصلهم لبلايص لي صعيب يمشيو ليها بلا بيه و تايسول فيهم و يهضر معاهم و يشارك معاهم الزوين و الخايب لي تايدوزو بيه.

الكار دالفجر فعلا ماشي كار عادي، بل عائلة بسيطة و صغيورة كاتلاقى كل نهار. و كانت تجربة الكار بالإضافة لمشهد الشروق لي قدرت نشد في الطريق من أجمل اللحظات ديالي في التسافيرة كاملة.

عين بني مطهر و عودة مخطط قطار الشرق

قبل مانبدأ الرحلة، من الحوايج لي كنت خططت باش نزيدهم في البلان هو قطار الشرق Orient Express لي لي تايمشي من وجدة لبوعرفة. هاذ القطار كان تايهز المعادن من الجزائر و من الصحراء الشرقية نحو البحر الأبيض المتوسط، و اليوم ولا قطار سياحي لي مكلفة بيه واحد وكالة الأسفار تابعة المكتب الوطني للسكك الحديدية. القطار تايدير الطريق في الصحراء بين وجدة و بوعرفة و تايوقف في محطات قطار ديال عين بني مطهر و تندرارة و أخيرا بوعرفة.

قبل التسافيرة كنت دخلت قلبت، و لقيت بلي ماكاينينش رحلات ديال هاذ القطار في الوقيتة لي كنت غانمشي فيها، و عاد الثمن كان مبالغ فيه حيت الرحلة كان داخل فيه سفر رحلة عبر مدن المغرب الكبار و هاذشي ماداخلش في المخططات ديالي أصلا.

منين مشيت لدبدو، كنت نسيت هاذ البلان ديال التران في مرة و كنت بغيت نشد الطرونسبور نيشان لبوعرفة. و لكن لسوء الحظ (أو لحسنه) مالقيتش الطروسنبور و قررت نرجع لتاوريرت و من بعد لعين بني مطهر.

عين بني مطهر او بركّم كيفما تايسميوها الساكنة المحلية هي مدينة بين وجدة و بوعرفة، النواة ديال المدينة بدات قبل الحماية بشوية و لكن غادي تكبر شوية من بعد الحماية و غادي تكون فيها محطة ديال القطار و مخازن ديال السلع و كنيسة و مساكن للعمال لي كانو خدامين تما.

حطني الكار في عين بني مطهر دخلت خديت فطور و رتاحيت شوية و من بعد بديت الجولة الإستكشافية ديالي، مشيت زرت المحطة و شفت الكنيسة و طلعت شفت المقابر المسيحية و اليهودية لي كاينين تمى و من بعد مشيت لدار الثقافة سولتهم على المدينة و التاريخ ديالها و رحبو بيا و عطاوني بزاف ديال المعلومات الله يجازيهم بالخير 😁

من بعد هاذ الجولة بدا تايرجع ليا للبال المخطط ديال قطار الشرق، و قلت مع راسي حتى ايلا مادرتوش في التران نقدر نديروا على رجلي أو على الأقل نمشي نشوف غير المحطات.

رجت في حالي للسوق باش نتقدا شي حاجات للطريق .. تقديت شي بركة ديال الفواكه و خديت الحامض و النعناع و قاديت واحد الموخيطو مضخم آ الخاوة. و تميت راجع للشارع الرئيسي باش نشد الطريق للمحطة الثانية، و هي توقف عليا واحد الطوموبيل.

• السيد: السلام عليكم، شكاتدير هنا
• أنا: و عليكم السلام، تانشري الفواكه
• مول الخضرة: رااه معاك الكوميسير
• أنا: أهلا، واش كاين شي مشكل
• الكوميسر(السيد): شنو كاتدير هنا
• أنا:تاندير السياحة، عمرني في حياتي حيت للجهة الشرقية و دابا جيت باش نشوف شنو لي كاين هنا
• الكوميسير: أنت منين
• أنا: أنا من سلا و لكن خدام في ….

المهم عاودت ليه واحد القصة على شكون أنا و علاش جيت و كيفاش أن الجهة الشرقية فاجآتني بالجمال ديالها

• الكوميسير: مالقيتي فين تدير السياحة غير هنا هههه .. المهم هاذي راه منطقة حدودية، را الجزائر غا في الدورة رد البال لراسك.
• أنا: واخا شكرا.

صايبت الموخيطو ديالي و نقيت شي رمانات و ليمونات و مشيت جلست في الجنب تانتسنى الكار و فينما بان ليا شي حد تاندوقو حتى جا الكار ههه.

• الكورتي: فين غادي
• أنا: تندرارة
• الكورتي: بوعرفة ولا تندرارة
• أنا: تندرارة
• الكورتي: أوكي، هههه

المهم وصل الكار لتندرارة نزلت و مشيت قصدت مول الحانوت.

استقبال تندرارة و الطريق الساحرة

مشيت عند مول الحانوت، تقديت شي لعيبات للطريق و دورت معاه الهضرة على تندرارة و على شنو كاين فيها. و أكد ليا بلي ما فيها مايدار، و تفاجئ بآشنو جابني أصلا ليها.

• أنا: جيت نشوف محطة القطار القديمة
• مول الحانوت: شغاتمشي تشوف تما؟ مافيها مايتشاف و أصلا بعيدة. غير غادي تضيع وقتك، سير ضرب ليك دورة في السوق و شد الكار و كامل لبو عرفة.
• أنا: صافي ذاكشي لي غادي ندير

المهم مول الحانوت عكّزني مزيان، من بعد ماكنت متحمس للفكرة صافي عكّزت و مابقيتش باغي نمشي, و صافي تبعت هضرتو و قلت بيدما يجي شي كار ولا شي طاكسي نمشي نضرب شي دورة في السوق و نرجع فحالي.

هي هاذيك مشيت في حالي للسوق، ضربت دورة خفيفة، و لكن للسوق كان تقريبا خوا و بقاو شي فراشات قلال و الناس برا تايتسناو الترونسبور باش يرجعوا بالتقدية ديالهم. كملت الجولة ديالي واخا هكاك و خرجت باش نمشي نشد طريق بوعرفة.

و أنا راجع تايبانو ليا شي ناس راجعين مجموعين و غادين طالعين لواحد التل، و فوق داك التل كاين واحد الدوار. هي هاذيك قلت أنمشي نتبعهم نشوف ذاك الدوار كيداير و ديك الساعة نرجع في حالي. وصلت للدوار دربت دورة .. بانو ليا وليدات صغار تقديت ليهم شي حليوات من عند مول الحانوت و سولتهم على محطة القطار .. واحد من الوليدات غادي يقول ليا بلي مابعيداش و بلي ايلا زدت حتى للقمة ديال ديك التلة غادي تبدأ تبان ليا.

هي هاذيك، طلعت للقمة ديال التلة على أساس غادي نصور المحطة من بعيد و نرجع مع الطريق. وصلت شفت المحطة تاتبان بعيدة، تشعبطت من واحد البلاصة باش نهبط من ديك التلة و نوسط للشانطي. لحد الساعة مازال الفكرة لي عندي في بالي هي أنني غادي نرجع مع الشانطي باش نشد الطرونسبور لبوعرفة.

جبدت التيليفون لي كانت مازال فيه شي 20% ديال لا شارج، شفت غوغل مابس و لقيت بلي كاينة واحد 6.5 كلم للمحطة. غير للإشارة في هاذ التسافير كنت كانتمشى أكثر من 25 كلم كل النهار يعني 13 كلم كي والو ههه و خاصة أن ذاك النهار كنت مازال ماكملتش حتى 10 حيت النهار كامل و أنا في الكار.

تلاقاو ليا السلوكة في ذماغي و قررت نشد الطريق في اتجاه محطة القطار ديال تندرارة.

أقل ماممكن نقول على هاذ الطريق هو أنها طريق ساحرة، لا طيرا يسير و لا بغلا يسير عاوتاني و لكن هاذ المرة الكّودرون غادي نـــيشان و الجبال على اليمين و على الشمال و ماكاينش الحس ديال تا شي حاجة. الطريق كانت بحال الطرق ديال أفلام هولييود ديال الويسترن و أحسن كّاع.

مرة مرة تايدوز شي تريبورتور أو شي كاميو (دوك الكاميوات القدام ديال المسيرة) جايين من السوق و هازين الناس و لكن حتى واحد مابغى يوقف ليا. من الخير أنا أصلا ماقاداني فرحة بهاذ الطريق الفريدة.

شوية بداو تايبانو ليا الخيم ديال الرحل ديال المنطقة، هاذ الخيم لي على شكل نصف بيضوي و لي مصايبين بجلود ديال المعز و شي مواد ماعرفتهاش من أكثر الحوايج اعجازا لي شفت في التسافيرة. كيفاش هاذ الناس قادرين يعيشوا في بلاصة خالية بحال هاذي و من فوق هاذشي يربيو مواشي لي تاتعتبر من الأفضل في المغرب. كملت الطريق مستمتع بالطريق و تانتعجب و تانتأمل في الشدة ديال هاذ الناس.

كانت رحلة تأملية بامتياز، و واحدة من أفضل المشيات لي درت في التسافيرة حتى غادي …

شنو واقع؟ ياكما كنت غانموت

غادي دن دن دن في الطريق و مستمتع بكل خطوة واخا الصاك ثقيل و الطريق طويلة، حتى كانسمع شي صوت ديال شي حاجة جاية هاذ المرة صوت موطور و لكن ماشي تريبورتور. دورت راسي باش نشوف لقيت 2 ديال المواطر 103 جايين جيهتي و راكبين فوق منهم 2 رجال موسطاشاتهم كثيفة و لابسين جلالب و عمامات، ثقلت شوية و كملت المشي.

• السيد: السلام عليكم
• أنا: و عليكم السلام، كيدايرين بيخير
• السيد: معاك أعوان السلطة
• أنا: أهلا، كاين شي مشكل
• عون السلطة: شكون أنت، في غادي و شكاتدير هنا
• أنا (هنا غادي نبدأ الكاسيطة): سميتي محمد ساكن في سلا و خدام في … و جيت باش ندير السياحة في الجهة الشرقية و فاجآتني بالجمال ديالها.
• عون السلطة: هاذ المنطقة لي غادي فيها راه خطيرة و فيها البرد و شي مرات تايفيض الواد و واش عندك الماء و الماكلة
• أنا: كون هاني أنا أصلا تاندير هاذ الرياضة و مولف كانتمشى و عندي الحوايج و الماء و الماكلة لي غادي يكفاوني
• عون السلطة: واخا عطينا لاكارط نصوروها و سير حدك المحطة و رجع
• أنا: واخا كونو هانيين، و شكرا حيت حارصين على الأمن ديالي، أنا نمشي نشوف المحطة و نرجع.

هي هاذيك من بعد التوصيات ديال المقادمية شديت الطريق باش نوصل بكري و مايطيحش عليا الظلام في الطريق. هي هاذيك دن دن دن حتى وصلت للمحطة، دربت دورة تفقدية و خديت تصاور و رجعت في حالي.

و أنا راجع عاد شعلات ليا البولة في ذماغي و وليت تانسول راسي شي أسئلة كيفاش شافوني مع العلم الطراجي لي درت غير على الله كان شوية مخبي و دزت مور واحد الدوار. و شوية بديت تانقول على أصلا تبعوني و بداو تايعكّزوني بجميع الطرق الممكنة (الجو، الخطر، المؤونة، الظلام …) و تاينصحوني باش نرجع فحالي بلا مانكمل.

في هاذ اللحظة أنا مازال مافاهم والو و مازال تانقول شنو واقع ههه، من بعد هاذ الأسئلة كاملة، قلت مع راسي آجي ياكما غانلقاهم مازال تايتسناوني في الطريق.

في طريق العودة، دازت عليا واحد R12 شيرت ليها و مابقاتش تحبس. هي هاذيك كملت طريقي دن دن دن. غير طلعت في الكدية و هوما يبانو ليا المقادمية باقين تايتسناوني هوما و الR12 لي مابغاتش تهزني.

• أنا: شكرا حيت بقيتو تاتسناوني و سمحو ليا برزطتكم معايا.
• المقادمية: ماكاين حتى شي مشكل، على الراس و العين. هانتا سير مع هاذ السيد آيوصلك حتى للفيلاج.

هي هاذيك، ركبت مع السيد في R12 و شدينا طريق العودة. كانت معاه بنتو صغيرة عطيتو واحد الحليوات كانو شاطو ليا من الفيلاج و هدرنا شوية واخا ماكانش مطلوق بزاف.

هي هاذيك وصلت أخيرا لتندرارة شكرت السيد و تحركت.

حوار مع القائد

صوت من بعييد: هااااا هاااا هااااااه .. فين غادي .. آآآجي لهنا فين غادي

ضرت، تايبان ليا واحد السيد مكشكش و تايغوت مافهمت والو، آآش واقع .. أنا لحد الساعة مازال عايش في عالم آخر و مافاهم والو على شنو واقع.

ضرت، قصدت ذاك السيد لي كان واقف حدا القيادة، و هو تايغوت

• أنا: السلام عليكم، لاباس؟ ياك لاباس؟
• السيد: شذاك لتما؟ كون متي، كون تلفتي، كون جات الرعدة و حمل عليك الواد.
• أنا: أنا مولف تاندير هاذشي و عندي الحوايج و المعدات باش نتمشى و درت جميع الاحتياطات و مشيت غير مع الطريق
• السيد: شذاك لتما؟ كون متي، كون تلفتي، كون جات الرعدة و حمل عليك الواد.

في هاذ اللحظة فهمت بلي هاذ السيد مستريسي و ماغاديش نتفاهم معاه. مع هاذ السيد كان واحد السيد آخر لابس اللباس عسكري لي قدم ليا راسو على أساس أنه خليفة ديال القايد و مخزني من القوات المساعدة.

لحد الساعة أنا مازال مافاهم والو، و ماعارفش علاش هاذ الناس مخلوعين عليا تال هاذ الدرجة و واش فعلا الطبيعة لي كنت فيها صعيبة تالهاذ الدرجة، ديجا تمشيت في طبيعة قاسحة و أصلا فايت دزت من بلايص لي أصعب من هنا و ما تخلوع عليا الناس تالهاذ الدرجة.

• الخليفة: شكون نتا؟ شنو كاتدير؟ علاش جيتي؟

ايلا باقي متبع تالهنا غادي تكون عارف بلي غاذي نعاود ليه ذيك الكاسيطة الطويلة ديالي.

• الخليفة: هاذيك المنطقة لي مشيتي ليها منطقة حدودية و الطبيعة ديالها خطيرة و كان ممكن تطرى ليك شي حاجة.
• أنا: ماكنتش عارف هاذ القضية خاصة أنا الناس كانو غادين جايين مع الطريق بالتريبورطورات و الكاميوات و ماكانت حتى شي إشارة في الطريق لي تاتقول بلي ممنوع نتمشى تما
• الخليفة: واخا هاكاك، ماكانش خاصك تمشي تما، كانت تقدر توقع ليك شي حاجة.
• أنا: متافق معاك، و شكرا حيت جيتو و حرصتو على السلامة ديالي و شرحتوا ليا كولشي.

من بعد شوية ديال دي و جيب في الهضرة، عرفوا شوية شنو تحت راسي و بلي ماكاين والو، تحولات المواضيع ديال النقاش لمواضيع آخرى شخصية و عامة و هضرنا على سلا و كيفاش كانت و كيفاش ولات و على الزواج و أشياء أخرى. المهم التعامل ديالهم كان جميل و ماشفت منهم حتى شي عيب.

المهم في هاذ اللحظة طاحت عليا واحد السكينة و الطمأنينة عمرها طاحت عليا في حياتي. في ذاك المشهد لي مافاهم فيه والو كنت أنا أكثر واحد مامستريسيش.

صافي منين سالاو المواضيع، هزيت صاكي و طلبت منهم باش نتحرك فحالي لبوعرفة. الخليفة طلب مني نبقى حتى يجي القايد و عاذ نمشي. بقيت كانتسنى شي بركة، و مازال مافاهمش شنو واقع و علاش خاصني نتسنى القائد و لكن مكالمي و لسبب ما فرحان و تانقول تجربة جديدة هاذي. الحالة ديال الهدوء لي كنت فيها في ذيك اللحظة عمرني وصلت ليها واقيلا.

هي هاذيك جا القايد دخلت معاه للبيرو، سولني شكون أنا و عاودت ليه قصة حياتي كالعادة .. و بقينا تانهضروا عاوتاني و عطاني جميع الأسباب علاش ماكانش خاصني نكون تما لي منهم بللي الطبيعة صعيبة و باللي المنطقة حدودية و باللي الرحل لي عايشين تما ماعندهمش مع البراني …

حتى قلت صافي ساليت، و غانمشي في حالي .. القائد طلب مني نمشي عند الجوندارم باش يبوانتيوني ويشوفوا واش مبحوث عني أو لا ..

كيفاش كنت غانخلق أزمة ديبلوماسية بين المغرب و الجزائر

لحد الساعة مازال مافاهمش بالضبط شنو واقع و ماغادي نفهم الصورة كاملة حتى غادي نمشي عند الجوندارم و غادي يشرحوا ليا المسائل بطريقة مباشرة .. الطريق لي كنت غادي فيها كانت في إتجاه الحدود الجزائرية نيشان. و مباشرة من بعد السكة ديال التران تاتنبدأ المنطقة الحدودية، كانت بقات شي 20 كلم. و في حالة كون كملت شوية كانو 2 احتمالات، إما غادي نوصل للحدود د الجزائر و غادي توقع شي مشكلة الله يستر مع حرس الحدود ديالهم، و خاصة ديك الوقيتة كان يالاه وقع مشكل السعيدية. أو كانوا غادي يشدوني حرص الحدود ديالنا و في هاذ الحالة غاذي يروونديوني نيشان للرباط و هاذشي لي غادي يخلق مشاكل بزاف ليا و بدرجة أكبر للسلطات المحلية ديال المنطقة لي غادي يتسماو مادايرينش الخدمة ديالهم.

المشكل الثاني هو أن تندرارة فيلاج صغير و من الناذر (و ربما من المطلق) فين تايجي شي حد تما من برا و خاصة باش يدير السياحة و هاذشي لي خلا السلطات مايفهموا والو في الحالة ديالي و يدخلهم الشك في شكون أنا و النوايا ديالي.

من بعد غادي نعرف بلي الخبر ديالي وصلات لعمالة الإقليم و أنه ناضت الروينة و كلشي كان تايترقب شكون غايكون هاذ خونا لي هاز صاك و غادي قاصد الدزاير.

المهم، بوانيت، لقاو الضوسي نقي الحمد لله، شكرت القائد و الخليفة و الجوندارم و طلبت منهم السماحة على هاذ الروينة كاملة. و شديت الطريق لبوعرفة. من حسن حظي غير خرجت للشانطي لقيت الطاكسي تايتسناني ركبت اللور و كانو قدامي واحد الكسابة تايدويو على الحوالا و البيزنيس أنا اللور كانسمع للحديث ديالهم و تانستمتع بالغروب لي كان يالاه بدأ. في هاذ اللقطة تعاود النهار كامل قدام عيني و تفكرت كيفاش كنت غادي ندير موصيبة و كيفاش كنت تانتعامل بهدوء بحال ماواقع والو و بديت تانضحك غا بوحدي الطريق كاملة.

الخلاصات

• الحدود ديال المغرب محضية مزيان، سواء من السلطات المحلية ولا من المواطنين ولا حتى من حرس الحدود. الناس دايرة خدمة نقية.
• منين تمشي لشي بلاصة لي مربجة بحال منطقة حدودية ولا شي بلاصة خطيرة دائما قصد الجوندارم ولا القيادة و سولهم على البلاصة. هاذ القضية تانديرها شي مرات و تاتصدق. هوما تايوريوك فين تمشي و شي مرات تايعاونوك في الطرونسبور و التحرك كيفما وقع في تاوريرت.
• المشكل ديال الحدود بين المغرب و الجزائر كلو غير خسارة، من غير المبادلات التجارية و العلاقات الانسانية لي بين الشعبين، هاذ المشكل حارم المغاربة من السياحة في شي مناطق لي رائعة و ماكاينش بحالها في بلايص آخرين في المغرب. كانتمنى سي تبون يهديه الله و يحل الحدود قريبا.