اليوم و دابا تاندور في تويتر حتى لقيت واحد الأرتيكل مريتويتيه عثمان تايهضر على الخوف. و أنا نقول مايمكنش مانكتبش على القصة ديالي مع الخوف. تالهاذي اللا !
القصة بدات من الصغر، شوية من التربية و شوية من الإرث الاجتماعي و ربما حتى الجيني ديالي. المهم هاذي قصة طويلة و مافيا مانكتب عليها.
آجي ننقزو نيشان للسنة الأولى ديال التعليم العالي .. هنا غادي تبدأ تبان القصة ديالي مع الخوف دبالصح.
العام الأول: فريشمان
باش نقربك من كيفاش كنت في العام الأول في لينصا، الحصص لي فيهم Presentez Vous ليهم الله سبحانه .. فينما كنت تانسمع بللي شي أستاذ تاينوض الناس لTD و لا تايشير بصبعو باﻷسئلة كان تايضيع فيا واخا يكون تايصيفط الغياب لرئاسة الحكومة. كاين شي مشكل، أنا ماكاينش، خاصنا نديرو شي بريزونطاسيو أنا ماكاينش، كاين شي حصة فيها الهضرة أنا ماكاينش ….
كنت داخل في النادي ديال لانفورماتيك، ولكن ديما تانحضر بحال شي صنم، غا مانسمع و نشوف.
في هاذ العام درت شي بركة ديال الأصدقاء، و تعرفت على شي ناس زوينين و لكن بالزز و أغلبيتهم كانوا بحالي 😆 و الصراحة أغلب هاذ الناس مازال صحابي لدابا، و من أقرب الناس ليا.
زدت فيه شوية و لكن ماشي بزاف 😛
العام الثاني: آيما الحبيبة
العام كان بدا بواحد البويكوط، و بسبابو تشجعت شوية و تحركت .. و منين سالا استغليت ديك الطاقة لي كانت باقا عندي و سولت في الكّروب ديال المدرسة:
الأصدقاء ماكاينش شي نادي ديال الأعمال الاجتماعية و ذاكشي
كانت هاذي الجملة السحرية لي بدلات ليا حياتي للأبد.
النادي كان و مابقاش، و سميتو أناروز .. سالا هاذ البوسط بأنني غادي نلقى راسي على رأس الفريق المسؤول على إعادة إحياء هاذ التجربة مرة أخرى .. هاذ القرار كان من أصعب القرارات لي خديت في حياتي كاملة، و الأثقل على النفسية ديالي ..
داب خاسني نصايب الوراق، و نتواصل مع الإدارة و نجيري فريق من الناس لي فين و فين (كانوا معايا ديك العام غير الأباطرة ديال Enactus و JLM و نوادي أخرين😅😅). و أنا لي كنت تانقول OUI للبروف غير باش مايزيدش معايا الهضرة و أنا لي كنت ايلا شفت المدير واقف في الباب تاندخل من الباب لاخر.
باقي عاقل كل مرة تانمشي للإدارة على شي غرض و لا كل مرة تانديروا شي إجتماع كنت تايحس بالفشل في رجلي و الفراشات في كرشي. المجهود لي تايدير إنسان عادي باش يدير بحال هاذ الحاجات، كنت تاندير الدوبل ديالو بعرام ديال المرات.
و بطبيعة الحال بفضل العبقرية و العمل الذؤوب و التخطيط الاستراتيجي ديالي داز عام ساهل و نجحت بسهولة و وصلنا في أناروز للعالمية و بزاف دالحاجات ..
من نيتك تيقتي 😂😂 السوميستر الأول حطمت الرقم القياسي ديال الراط، بمعدل جميع الموديلات راط و الثاني فاليديت غير 2 من الدقة الأولى. و في أناروز بالزز باش درنا 2 ديال الأحداث و كان المردود طايح. و هاذشي كان جزء كبير منو بسبابي، حيت كنت مشتت و مرون و كّاع الخدمة لي كنت تانخدم كانت تاتمشي في والو. و حتى الناس لي كانو معايا في بزاف دالمرات ماكانوش عارفيني شنو تاندير.
و من بعد هاذشي كامل، تايبقى هاذ العام هو أهم و أجمل عام في حياتي حيت:
- واخا كان المردود قليل، كانت الخدم فيها بزاف ديال الحب و Authenticity من عندي من عند الأصدقاء و الصديقات لي كانو معايا، و هاذشي لي خلا التجربة ديال أناروز تولي من أنجح و أجمل التجارب في لينصا ديال القنيطرة 🤍🧡
- واخا خربتها في المدرسة و ماقريت والو داك العام، تعلمت بزاف ديال الحوايج، و وليت إنسان واحد آخر.
- تعلمت باللي الخوف عادي، و تعلمت نتقبلوا و نعيش معاه، و تعلمت بللي الألم جزء أساسي من النمو، و ايلا الواحد ماتعذبش و ماحسيتش بالتلفة و بالفشل و الخلعة و و و عمرط ماغاتتطور
- تعلمت باللي ماشي بالضرورة تكون داير بشي طريقة باش تنجح، و لا باش تدير حوايج زوينين. أنت كيفما أنت ممكن تدير أي حاجة بغيتي
المهم خلينا من هاذشي كامل و آجي نكملوا القصة .. العام داز طويل و البزربة و نجحت بالزز و لكن وليت إنسان آخر، باقي خواف و باقي مخشي في قوقعتي و لكن هاذ المرة عرفت باللي واخا كنت مخلوع ماطرا والو و الأمور دازت مزيان، تحت شعار و شنو غايطرا كّاع؟!
واحد الحاجة مهمة لي بغيت نركز عليها هو أنني ماشي مابقيتش تانخاف ولكن تعلمت باللي الخوف شي حاجة عادية و وليت واخا تانخاف تانتفكر بللي في المرات لي فاتو مهما كانوا العواقب سالات الأمور بشي حوايج زوينين و هنا فين تانزعم
العام الثالث: شد لارض
العام الثاني استنزفني نفسيا ديال بالصح، الحاجة الوحيدة لي كانت مصبراني هي أنني تحولت لسلم المهندسين و غانولي نقرا غير لانفورماتيك.
و السحري آ الناس وليت إنسان واحد اخر .. و هنا غادي نعطيك واحد السر ديال النمو: تايبدا بستريس بزاف ولا شوية المهم يكون صحي و يكون محدود في الزمن، هنا بالستريس ماتانعنيش بيه الحالة النفسية و لكن تانعني بيه تغيير في الوسط و الحياة لي تاتعيش فيها و لي تايخليك مامرتاحش. و من بعد تاتجي عليك مرحلة ديال الهدوء و من موراها تاترجع بحال ايلا ماكاين والو. و هنا تاتكون ديجا قولباتك الحياة و تاتكون
كبرتي بلا ماتعيق
هاذا أنا العام لي موراه تانهضر قدام المدرسة كاملة (زدت فيه عاوتاني) في لونفي .. بغيتي نقول ليك هاذ المرة ماكنتش مخلوع .. وااااا لااااااأح .. باقي مخلوع، و فيا الفشل و ماعرفت شنو .. آووو من بعد، خاصني نديرها ماعندي ماندير.
الخوف شي حاجة إنسانية و عادية ما فيها حتى شي عيب
هاذ العام داز مختلف واحد الشوية حيت مرضت واحد المرضة قاصحة شوية. هاذ المرضة كانت بمثابة الفران بالنسبة ليا. واخا كانت صعيبة هاذ المرضة، خلاتني نشد الأرض و نرجع نتكونسوطرا على حياتي و صحتي و العائلة و نرجع نخدم بشوية. و ها القضية مهم بزاف، أنك تخرج من Confort Zone مزيان و لكن خاص تكون لحظات ماشي يعيش حياتك كامل براها 😛 الثابت في الحياة هو الروتين و باش تعيش مزيان و فرحان خاصك تبني روتين صحيح و مزيان و تدردر عليه مغامرات و خرجات من الكونفورت زون.
هاذ العام و بسباب المرض و بيان سير حبيب الجماهير الخوف فلتت بزاف ديال الفرص منهم أنني نترأس النادي ديال لانفوماتيك EIC و منهم أنني نشارك في MCPC و منهم شي حوايج آخرين أقل أهمية.
في الجانب المضيء للي كان مكلف بالكلوب كان هو فادي، لي كان أكثر من ناضي في التسيير دالمسائل و للي بسبابو درنا واحد العلاقة قوية بيناتنا و واحد لومبيونص مريكّلة لي خلاتنا لدابا باقين صحاب و صحابات البرومو كاملة ماشي غير الناس ديال الكلوب. يكفي نقول ليك أننا كنا تانخرجوا نتعشاو، نلعبوا كارطة، نجمعوا في بيفيت اكثر من النص ديال البرومو و يكفي نقول ليك أنه Les DD و Les mobilites بقاو غير شايظين في الآخير و لي كان باغي يمشي لفرنسا مشى (أكثر من 20) بلا زحام بلا حقد بلا مشاكل و كولشي كان مفاهم.
أحسن برومو في العالم هي GI 2020 ENSAK
هاذ العام في EIC كنت مكلف بالفورماسيو Responsable de Formation و هاذشي لي خلاني نكتاشف من جديد الpassion ديالي في المشاركة ديال داكشي لي تانعرف مع واحد الناس، هاذ الناس لي كانوا رااائعين و ديما تانقولها ليهم
كنت جاي باش ندير ليكم فورماسيو صدقتوا بدلتوا ليا حياتي للأبد
العام الرابع: Yes Man
بقدر ماكان العام الثالث رتيب و ممل، العام الرابع كان عامر أكشن. في عام واحد خدمت في عرام ديال البروجيات ديال القراية، خدمت في بروجيات ديال PFE ديال شي أصدقاء و صديقات، خدمت على بروجيات في دارنا، حتى من الدوكتوراه ما قلتهاش و عاونت واحد السيدة في المشروع ديالها في السطاج ديالي.، خدمت ع
هاذشي كامل، زيد عليه الEvents لي مازكّّلت تاواحد كنت عارفوا كاين، من رباط للقنيطرة و سلا ماكنت تانزكّل والو، حتى من كازا لي كانت تاتبان لي بعييدة كنت مشيت ليها شي 2 مرات على وديت نفس الغرض
في المدرسة وليت أمير البريزونطاسيونات، غا لي خاصو شي حد يدخل معاه في شي بلان أنا في الدمة، آشمنك يا فروننصي و آشمنك يا نكّليزا.
و أخيرا الهاكاطونات لي ماكانوش تايدخلوا ليا لراسي شاركت في 3 جوج منهم بيتشيت فيهم و ربحنا فيهم المرتبة 2، و من هاذ المنبر تانقول بللي واحد 3 المليون ماشفنا منها والو 😆😆
سبب آش ؟ ماعرفناش سبب آش! غير تانضحك السبب هو لقيت واحد الهاك بسبب السينما و قوة الأقلام لي كنت تانشوف .. شنو علاقة السينما بهاذ التحول؟
واحد النهار شفت هاذ الفيلم ديال جيم كاري، فين تايقق يبدأ يقول “آآه” لأي حاجة مهما كانت. واخا الفيلم ديال الضحك الفكرة زوينة و عميقة شوية. صافي توكلت على الله و قرر تا أنا نتبع هاذ الفلسفة، في اللول بديت غير بالطنز و من بعد شوية بشوية لقيت راسي بالصح وليت تانقول لكولشي آآه. وهاذشي لي خلاني ندير شي حوايج عمرهم طاحوا ليا في بالي بالمرة.
و بسباب هاذ الفلسفة دازت عندي السنة الرابعة هي أعمر سنة في التاريخ، و ماجات تسالي تا عييت بالجهد و مابقيت قادر ندير تا حاجة.
:شي لعيبات من العام الرابع
- أناروز لي دويت ليك عليه كبر بزاف مقارنة مع ذاكشي لي كان قبل عامين و ولا Hub ديال الناس الزوينين لي بفضلهم دخلات الفرحة على بزاف ديال الأفراد و العائلات، وباقي لدابا الكلوب خدام و عام على عام تايكبر و يتطور.
في هاذ الصورة كاين أنا، هاذ المرة تايق في راسي و مرتاح أكثر و غانعاودها مرة أخرى باش نفرع ليك بيها راسك
هاذشي ماتايعنيش ماخايفش تايعني تايق بللي يطرا بي طرا مرحبا
- شتي كون شديت آلة سفر عبر الزمن و رجعت للباك وقلت لراسي بللي غادي يجي شي نهار غادي نهضر قدام أومفي عامر تال الفم غادي في اللخر غادي يعجبهم داكشي و غادي نربحوا، هاذاك راسي ديال الماضي غادي يسرط لسانو و يموت هههه 😆
هاذشي ماشي حيت صعيب و لكن حيت راسي ديال الماضي ماكانش عندو هاذشي في القاموس بالمرة.
العام الخامس: قربت نسالي صافي
عييت بالكتابة، وحتى في المدرسة كنت عييت من القراية. هاذ قرينا غير سوميستر واحد، الثاني كان سطاج. السطاج لي كان تاهو رحلة جميلة و مرحلة مهمة في حياتي.
هاذ العام كان في نفس الوقت حصاد و في نفس الوقت فرصة ليا باش نخرج نشوف حوايج جداد برا المدرسة و لي كانت أهمهم DevC و الكوميونيتي ديال التيك المغربي عموما. في هاذ العام فين بديت تاننقل الحب ديالي للباطاج لمدى أوسع و تانبارطاجي مع ناس أكثر في المغرب كامل.
الكومييونيتي كان ليها عليا فضل كبير، و خلاتني نتلاقا ناس زوينين كثار و نتعلم بزاف دالحوايج و نزيد للقدام.
الحمد لله من بعد هاذ الشقاء كامل صدقات النهاية سعيدة 😁😁، الأمور ديال السطاج تيسرات و جاوني فرص من بزاف ديال الشركات (ماشي شي بزاف شي 5 ولا 6)بلا مانمشي نقلب عليهم. و من بعد السطاج نفس الحاجة وقعاتلي في الخدمة الخدمة.
و هاذي كانت شي حاجة زوينة ليا، و ربما ليك أنت لي تاتقرا دابا. را تقدر تدير أي حاجة ايلا أنا لي جيت من مورا الشمش، و كنت ماتانقدر تانجمع جملة مفيدة قدام الناس (و الله العظيم😂😂) و دابا درت شي حوايج لي عمّر كان تايصحابلي ممكنين.
الربح و راس المال
ايلا وصلتي تال هنا راك ناضي(ة) شكرا بزااف و أجي نبوسك 😘 .. الحاجة الأخيرة لي بغيت نقولها قبل مانجمع و نطوي هي
الأهم من هاذشي كامل هو Impact لي تاتخلي موراك بلا ماتحس.
مأخرا في واحد الكونفيرساسيون مع واحد الصديق في لينصا، قال لي “منين تانقولو الداودي في برومو ديالنا بحال ايلا ماعرفت شنو قلتي و بزاف دالناس كايعتابروك قدوة”. حسيت بواحد التخليطة ديال الاحاسيس غريبة، كنت غانبدا نبكي ليه في الزنقة 😂
هاذ الهضرة تقدر تكون مبالغ فيها حيت جات من عند صديق عزيز، و لكن أنا عارف بللي قد ما تاثرت ببزاف ديال الناس في لينصا قدرت نأثر على الحياة ديال بزاف ديال الناس آخرين، بشوية و لا ببزاف ماتايهمش.
المهم من اللخر تكون لي كنتي، ماعندكش مع الفرونسي، جاي من حي شعبي، حاي من الجبل، ماعندكش الامكانيات، ماعندكش الزهر، وضعيتك ماعاجباكش، مادمتي حي تقدر تدير impact
الخلاصة و ذاكشي
أنحاول نلخص كولشي في شي نقط قلال:
- الخوف حاجة عادية و غريزية و ماعندها تا علاقة مع بالثقة في النفس .. ايلا ماتاتخلعش راك ماشي إنسان عادي أو داكشي لي غادي تجيب ماعندوش قيمة و ماغاتعلم منو والو.
- خاصك تتقبل الخوف، و تعرف بللي راه جزء أساسي من أي حاجة جديدة غاتدير.
- هاذي ماشي قصة نجاح، مازال ماتانعتابرش راسي ناجح، و شي مرات ماتانبقاش تانآمن بلي النجاح كاين أصلا. بالعكس هاذي قصة struggle و تعلم و هاذشي هو المهم في الحياة.
- المحيط ديالك و الهضرة لي تاتسمع كل نهار مهمة، من أهم الحوايج لي تايخليوك تواجه الخوف و تاتقبلوا
- ماشي كاملين تانخافوا من نفس الحوايج
- ماعندك حتى شي عذر باش ماتديرش حوايج زوينين، ملتزم(ة)، بنت جارنا، داخل سوق راسي، ماعنديش مع فرونسي، محنسر … هاذو غير أعذار.
السموحات ايلا كان هاذشي طويل .. في الأول كنت معول على باراكّراف ولا جوج، صدقت عرام، شكرا حيت قريتي هاذشي كامل ♥️
بسلامة 👋 Stay Awesome !
